Alerta Urxente: Concentración nos Xulgados de Ferrol

Alerta Urxente: Concentración nos Xulgados de Ferrol, ante un xuízo de desafiuzamento dunha familia sen recursos económicos - Luns 15 de xaneiro, ás 10:45hs - Nin Casas sen Xente, Nin Xente sen Casas ! - Polo dereito a unha vivenda digna e axeitada!

Concentración en Ferrol por mor dun xuízo por desafiuzamento

Día: Luns 15 de Xaneiro.
Hora: 10:45 hs.
Lugar: Xulgados de Ferrol.

En Ferrolterra, non cesan as mostras de inxustizas e empobrecemento de sectores importantes da veciñanza. A falta de emprego e de perspectivas de consigue-lo a curto ou medio prazo, deprimen socialmente a unha comarca castigada pola crise con dureza. As cifras absolutas e indicadores sociais e económicos, non son cifras nun papel ou nunha pantalla, son casos reais de persoas que o están pasando mal, sen albiscar unha solución a súa crise persoal e familiar. Unha mala xestión dos recursos, ou mesmo a falta dos mesmos agravan a situación das familias que necesitan unha solución xa.

O problema da vivenda é un dos máis importantes problemas que teñen que afrontar moitas persoas acosadas polos bancos ou rentistas que non teñen piedade coas persoas empobrecidas e abandonadas a súa sorte, sen ter a onde acudir, ante uns servizos sociais mal xestionados e sen recursos, ou dependentes de esmola que até está, en parte, privatizada polos que dicían que ían ás institucións para cambiar as cousas.

As persoas que non, ou apenas, poden ter apoio familiar, son as principais vítimas desta situación. Nomes como Silvia, Emilia, Francisco, Elisa, Rocio, Sandra, Katerine, Paco, Iván, Mariola, Verónica, Dulce, Aurelia, María José, Carlos ... E tantos outros e outras, forman parte dunha relación de persoas con necesidades que non son máis que dereitos fundamentais vulnerados, ao traballo, á vivenda á alimentación,... a unha vida digna. Non podemos quedar calados, temos que romper o silencio e reclamar unha solución,... vivir con dignidade, parque público de vivendas, renda básica universal europea, subministros básicos garantidos (luz, gas, auga,...) ... emprego,... Solidariedade e Xustiza. 

EMERXENCIA XUÍZO DESAUFIZAMENTO

Está previsto para este luns 15 de xaneiro, ás 11:00, no xulgado de instancia n°5. Un desafiuzamento por falta de pagamento do alugueiro de 325 euros mensuais, por mor de falta de recursos económicos, familia monoparental de tres membros un menor de idade. Un xuízo de desafiuzamento, por non poder pagar o alugueiro. Un xuízo contra Silvia, o seu fillo menor e a súa filla. Silvia quedou no paro sen cobertura por prestación por desemprego, o 10 de febreiro comezará a cobrar o subsidio de desemprego, uns 430 euros, por un período de seis meses. Ten solicitado vivenda social; ten solicitado bono de alugueiro social que só o puido facer desde este 10 de xaneiro, pois estaba pechada a posibilidade de face-lo desde o pasado 20 de novembro; ten posto solicitude de axuda por emerxencia social no Concello de Ferrol; estivo no Programa Reconduce de Ferrol (Xunta); estivo na Oficina Antidesafiuzamentos do Concello; pasou sen nada este Nadal; xa foi a unha primeira vista de comparecencia xudicial , onde quedou adiado o xuízo que estaba previsto para o pasado 5 de xaneiro. E non chega ningunha solución, nin alternativa residencial. Só que vaia buscando vivenda, din-lle desde a Xunta, pois van tardar en dar-lle unha solución desde a administración. E todo isto nunha cidade con máis de 9.000 vivendas baleiras. Os poderes públicos non responden. Onde está o Programa de Vivendas Baleiras da Xunta, onde está se queira o inicio do parque público de vivenda prometido nos programas electorais,... Non temos máis remedio que denunciar publicamente esta situación, para o que nos mobilizamos con ese fin. 

Concentración

Luns 15 de xaneiro, ás 10:45hs, diante dos Xulgados de Ferrol, concentración de denuncia e solidariedade, por unha vivenda digna. Convocada pola PAH de Ferrol e Comarca e Stop-Desafiuzamentos da Rede de Apoio Mutuo de Ferrolterra.
Lugar de Encontro e Asesoría Colectiva

TODOS OS MARTES (EXCEPTO FESTIVOS) VEMO-NOS EN CARANZA, POLA TARDE, ENTRE AS 17:00 E 19:00 HORAS, NO LOCAL DE FUCO BUXÁN (RÚA ARMADA ESPAÑOLA, Nº 32 BAIXO) ESTAMOS XENTE DE STOP-DESAFIUZAMENTOS E DA PAH DE FERROL E COMARCA. SE QUERES PARTICIPAR ACHEGA-TE.

Nin Casas sen Xente, Nin Xente sen Casas !
Contra o abuso bancario !
Polo dereito a unha vivenda digna e axeitada!
Si se Pode !! Saúde e Vivenda Digna !!

Stop-Desafiuzamentos da Rede de Apoio Mutuo de Ferrol Terra | Está Adherida ás PAHs (17.03.2013) e forma parte da Coordinación Galega de STOPs e PAHs.

Correo-e:
forosocialdeferrolterra@gmail.com

Blogue:
http://stop-desafiuzamentos-ferrolterra.blogspot.com.es/

Páxina no facebook:
https://www.facebook.com/StopDesafiuzamentosDeFerrolTerra

Local:
Avda. Castelao S/N.
Local de Arméria Soc. coop. Galega
Traseira do Mercado Municipal de Caranza
1406-Ferrol